Lóg fyri Føroya Javnaðarflokk

Flokkurin
§1
Navn floksins er FØROYA JAVNAÐARFLOKKUR. Flokkurin er óheftur av øllum øðrum politiskum flokkum.

Endamál floksins
§2
Javnaðarfloksins endamál er at upplýsa Føroya fólk um javnaðarhugsjónina, og í samsvar við grundsjónarmið floksins at fylkja fólkið um at gera Føroyar til eitt sosialistiskt samfelag á fólkaræðisligari grund.

Limir
§3
1.petti. Øll sum góðtaka sosialistisku grundsetningarnar, soleiðis sum teir eru viðtiknir í grundsjónarmiðjum Javnaðarfloksins, kunnu gerast limir í flokkinum við at tekna seg sum lim í einum javnaðarfelag ella beinleiðis í flokkinum.
2.petti. Limur, ið mótarbeiðir grundsjónarmiðum Javnaðarfloksins ella ikki fylgir galdandi floks- ella felagslógum, kann koyrast úr flokkinum.
3. petti. Avgerð hesum viðvíkjandi kann einans takast á landsstevnu /landsfundi við vanligum atkvøðumeiriluta.

Floksstarvið
§4
Flokkurin tekur lut í øllum valum til almenn umboð

Álitisfólk
§5
1. petti. Fyri at verða uppstillað(ur) til tey ymsu valini, sum flokkurin luttekur í, krevst, at viðkomandi hevur verið limur í flokkinum í minsta lagi 6 mánaðir. Sama er galdandi fyri tey álitisstørv, sum Javnaðarflokkurin á tingi og í bý/bygdaráðum velja. Undantøk kunnu bert gerast í serstøkum førum, um floksleiðslan góðkennir tað.
2. petti. Allar nevndir, ráð, umboð og líknandi í flokkinum verða sett saman soleiðis, at umleið eins nógvir limir av báðum kynum eru umboðaðir.
3. petti. Landsstýrissessir Javnaðarfloksins kunnu bert mannast við fólki, sum floksleiðslan kann góðtaka.

Landsstevnan
§6
1. petti. Landsstevnan verður hildin í minsta lagi fjórða hvørt ár um heystið. Stevnan er floksins lóggevandi og í øllum lutum annars hægsta vald.
2. petti. Á landsstevnuni koma hesi mál til viðgerðar :
1) Formaðurin greiðir frá politiska virkinum hjá flokkinum síðan seinasta landsfund/landsstevnu.
2) Orðaskifti um formansins frágreiðing.
3) Skrivarin greiðir frá fyrisitingarliga virkinum hjá flokkinum síðan seinasta landsfund/landsstevnu og leggur fram grannskoðaðan ársroknskap fyri flokkin.
4) Orðaskifti um frágreiðing skrivarans
5) Frágreiðing frá feløgunum.
6) Virkisskráin.
7) Val av starvsnevnd.
8) Val av floksleiðslu.
9) Val av ríkisgóðkendum grannskoðara.
10) Ásetan av limagjaldi.
11) Val av undirnevndum at ráðgeva valdu umboðunum.
12) Innkomin uppskot um lógarbroyting ella ískoyti til hennara.
13) Innkomin uppskot.
14) Ymist.

Landsfundurin
§7
1. petti. Landsfundurin skal haldast hvørt ár um heystið, tá landsstevna ikki er, og er hon frásæð landsstevnuni floksins hægsta vald.
2. petti. Endamálið við landsfundinum er gjølla at viðgera floksins virki og politisku støðu og leggja til rættis framtíðarpolitikkin.
3. petti. Á landsfundinum koma hesi mál til viðgerðar :

1) Formaðurin greiðir frá politiska virkinum hjá flokkinum síðan seinasta landsfund/landsstevnu.
2) Orðasskifti um formansins frágreiðing.
3) Skrivarin greiðir frá fyriskipanarliga virkinum hjá flokkinum síðan seinasta landsfund/landsstevnu og leggur fram grannskoðaðan ársroknskap.
4) Orðaskifti um frágreiðing skrivarans.
5) Frágreiðing frá feløgunum.
6) Val av starvsnevnd.
7) Val av floksleiðslu.
8) Ásetan av limagjaldi.
9) Politiskt orðaskifti.
10)Ymist.

Uppskot, ið viðvíkja lóg floksins
§8
1. petti. Uppskot um lógarbroytingar ella ískoyti til lógina, sum feløg, limir, floksleiðsla ella undirnevndir vilja hava til viðgerðar á landsstevnuni, skulu vera starvsnevndini í hendi minst 2 mánaðir undan ásetta stevnudegnum.
2. petti. Tey innkomnu uppskotini verða send feløgunum til viðgerðar 1 mánaða undan landsstevnuni.

Umboðan o.a.m.
§9
1. petti. Landsfundurin/landsstevnan verður skipaður av umboðum frá feløgunum, sum hava eina atkvøðu fyri hvørjar 10 limir. Beinleiðis limir hava 1/10 atkvøðu. Allir limir hava rætt at møta á landsfundi/landsstevnu, har teir hava talurætt.
2. petti. Tá fleiri feløg eru í einum valdømi, skulu feløgini velja eina samskipanarnevnd, ið fyriskipar felags fundum til uppstilling til løgtingsval og til uppstilling av floksleiðsluumboðum og varaumboði fyri hvørt einstakt floksleiðsluumboð. Eisini skipar samskipanarnevndin fyri politiskum tiltøkum av felags áhuga fyri alt valdømið.

Floksleiðslan
§10
1. petti. Floksleiðslan stendur til svars yvirfyri landsfundi og landsstevnu og virkar í teirra stað millum landsfundir/landsstevnur.
2. petti. Í floksleiðsluni eru formenninir í valfeløgunum limirnir í starvs-nevndini, løgtingsumboðini og møgulig landsstýrisumboð og fólkatingsumboð floksins. Haraftrat velur landsfundurin/landsstevnan eftir uppskotum frá valfeløgunum eitt umboð fyri hvørjar byrjaðar 100 limir í valfelagnum, tó í minsta lagi eitt umboð fyri hvørt felag aftrat formanninum.
3. petti. Floksleiðslan skal halda fund minst tvær ferðir árliga, í mars og septembur. Um minst 1/10 av floksleiðslulimunum krevja tað, skal floksleiðslufundur haldast.

Starvsnevndin
§11
1. petti. Í starvsnevndini sita formaður, 2 næstformenn – ein av hvørjum kyni, skrivari og tríggir nevndarlimir.
2. petti a) Formaður, næstformenn og skrivari vera valdir hvør fyri seg.
b) næstformenn og skrivari kunnu ikki vera fólkavald, samstundis sum tey røkja hesi álitisstørv í flokkinum.
3. petti. Uppskot til starvsnevndarlimir skulu vera flokkinum í hendi ikki seinni enn 3 vikur undan landsfundinum/landsstevnuni
4. petti. Starvsnevndin stendur til svars yvirfyri floksleiðsluni og landsfundinum /landsstevnuni og kann í hastimálum taka avgerðir millum floksleiðslufundir.
5. petti. Starvsnevndin hevur ábyrgdina av rokniskapi Javnaðarfloksins.
6. petti. Flokkurin verður bundin fíggjarliga við undirskrift formansins saman við undirskrift skrivarans.
7.petti. Fer starvsnevndarlimur frá í starvstíðini, setur floksleiðslan avloysara í hansara stað til næsta landsfund/landsstevnu.

Seinast broytt á Landsstevnuni 2000