26.01.2006
Spyrjari: áhugaður
hey Elin. síggi í dimmu at nú skal broyting/betring koma í bussleiðina væntandi í august mánaði. Tað ljóðar gott, men hevði tað ikki verið eitt hugskot at t.d. spurt bussførararnar um teirra meining áðrenn ein nýggj ferðaætlan varð gjørd??? teir vita jú alt um tíðir, ynskir frá ferðandi, o.s.v, o.s.v. og, ja, hvat við at gjørt eina gallup kanning áðrenn ?? tað er so í dag !? 

Svar:
Sjálvandi kenna bussførararnir bussleiðina væl. Tað er tekniska nevnd, sum arbeiðir við málinum, eg eri ikki í nevndini, so eg kenni ikki allar smálutir í tilgongdini. Samgongan hevur sett sær sum mál, at bussleiðin skal betrast, vit halda ikki at hon er nóg góð sum er. Gallup kanning haldi eg ikki er neyðug í hesum førum, vit vita at bussleiðin skal betrast. Hon skal helst koyra títtari, koyra meira í vikuskiftinum og røkka longri

Svar:
Hey John! Takk fyri viðmerkingina. Ja, kostnaðurin fyri barnaansing er sera høgur í Havn. Tí hava vit frá 1. august í ár, setta systkinaavslátt á 25% í gilið. Hetta munar hjá familjum við fleiri børnum, men familjur við einum barni fáa einki burturúr hesum. Eg eri púra samd við tær, at vit eiga at arbeiða fram ímóti nógv lægri barnagjaldið. Persónliga haldi eg, at 1000 kr. átti at verið hægsta gjaldi fyri eitt barn. Ja, eg vil virka fyri, at barnagjaldið gerst enn bíligari enn tað er í dag. 


13.08.2005
Spyrjari B.A.
Tú skrivar á síðuni um plantuliting at ein kann nýta krom at beisa við, havi sjálv havt ætlan at nýta hetta evnið, men má hava loyvi frá arbeiðseftirlitinum fyri at keypa tað. Er tað nakað tú veitst um?

Svar:
Takk fyri viðmerkingina. Tað er so langt síðani, eg gjørdi tilfari um plantuliting, tá kundi krom keypast í handkeyp, á Apotekinum. Krom er vandamikið at arbeiða við, tí skal tú hava loyvi frá arbeiðseftirlitinum, fyri at keypa tað. Eg havi nú viðmerkt hetta á síðuni.


20.05.2005
Spyrjari Hanne Dahl
Hey Elin. í samband við hundadagarnir í Hoydølum her fyri, fingu vit nakrir høm høm posar frá býráðnum, at deila út. Hetta vóru vit, ið fyrireikaðu dagin sera glað fyri, og fólk tóku eisini væl ímóti teimum. Men hvar eru tær lovaðu skrellispannirnar? eitt er at man far fólk til at taka lortin upp eftir sær, men einki vanligt fólk, tímir at ganga runt í býnum og veipa við einum posa av lorti, og so slett ikki við lorti frá teimum størri hundunum. Eg var sjálv úti í Hornabøð nú ein dagin, við hundinum hjá mær.  Har "kukkaði" hann, og eg mátti ganga við lortaposanum har frá og líka til Boganes, áðrenn eg fann eina skrellispann. so eg haldi at tað er fínt at tit royna at fáa fólk til at taka ábyrgd fyri hundunum hjá sær, og tað í har til hoyrir, men hetta líkist ongum. man kann ikki baði blása og hava mól í munninum vel? 

Svar:
Hey Hanne! Í sambandi við umhvørvisdagarnar í apríl, blivu 56 nýggj ruskíløt sett upp. Nýggju ruskíløtini eru sett upp í miðbýnum. Fleiri íløt eru bíløgd, tey vera sett upp so skjótt sum tey eru komin. Vónandi gongur ikki alt ov long tíð, til hesi íløt vera sett upp.
Nú veit eg ikki hvønn veg tú hevur gingið, frá Hornabø út á Boganes, tí um tú fór gjøgnum býin, so átti tú at komi framvið fleiri ruskíløt.
Eg skal annars rykkja eftir ruskíløtunum, men ímeðan má eg heita á tykkum hundaeigarar, um at geva tol, vónandi ikki alt ov langa tíð afturat.


06.05.2005
Spyrjari: Forvitin Havnarborgari
Spurningur:
Nú er tú so sloppin framat har avgerðirnar verða tiknar - tillukku við tí :-) men ætlar tú tær framvegis at arbeiða miðvíst við at fáa gjørt eitt krematorium til okkum Havnarborgarar og kanska eisini til hinar borgararnar kring landið? Ella var talan bert um valflesk?

Svar
Takk :-) Eg arbeiði við spurninginum um krematorium. Fyrst er ætlanin at kanna, hvat krevst fyri at hava eitt krematorium, síðani um tað er møguligt at gera eitt í Havn ella í Føroyum. Nei talan var als ikki um valflesk



09.03.2005
Spyrjar: Lisa M. Anderssen
1. hvat stendur Javaðarflokkurin fyri? 2. hvat mál raðfestir javnaðarflokkurin?

Svar
1.Javnaðarflokkurin byggir á eitt samhaldsfast samfelag. Eitt samfelag har hvørt einstakt menniskja gerst frælsari. Frælst til sjálvt at velja sín lívshátt í einum samfelag har frælsi, javnaður og brøðralag er grundarsteinurin.
2. Javnaðarflokkurin raðfesti fólkið fyrst.

09.03.2005
Spyrjari: Jóannes Martin Jóhannesen
Hey :-) Kanst tú ikki nevna eitt hvørt um bæði Helenu Dam á Neystabø og Heðin Mortensen eru komin yvir í Javnaðarflokkin.

Svar
Øll kunna tekna seg sum lim í Javnaðarflokkinum, treytirnar fyri limaskapi kunna til lesa í viðtøkunum floksins § 3. Tey bæði tú nevnir her, hava bæði melda seg úr øðrum flokkum, áðrenn tey komu uppí Javnaðarflokkin.  Tey hava sama frælsið sum øll onnur, at  gerast limir.

09.03.2005
Spyrjari: Petur
Hey Elin :-)  Hvønn aldursbólk vendir Javnaðarflokkurin sær mest til? 

Svar:
 Flokkurin vendir sær til allar aldursbólkar. Flokkurin hevur eitt ungmannafelag sum eitur SU, limirnir í SU eru undir 30 ár.


16.11.2004
Spyrjari: Marni Mortensen
Spurningur:
Nú rokni eg við tú hevur góða tíð at svara, áðrenn tit veruliga fara til arbeiðis aftur :-) Sá at "partamaðurin" hjá tær, Torfinn, sum tann einasti tordi at taka bussleiðini nokkso ítøkiliga uppá tunguna áðrenn valið. Veit at Leivur er nokkso jaligur í bussmálinum. Fara tit nú veruliga at gera nakað fyri øll okkum sum ikki tíma ella hava ráð at hava bil og sum eru góð við Havnina? Fara tit at koma við nøkrum ítøkiligum at broyta bussleiðina, so hon verður eitt veruligt alternativ til ALT ov stóru privatferðsluna? Hvat við minni bussum (umframt kanska) sum koyrdu oftari? Hvat við at latið í minsta lagi børnini og tey gomlu koyra ókeypis? Hava tit nakra veruliga "visjón" um bussleiðina, sum í nógv størri mun eigur at vera ein TÆNASTA til okkum skattgjaldarar, og ikki ein kastibløka, sum býráðslimir kunnu spara uppá, tí teimum (og børnum teirra) ikki nýtist hana sjálvi!

Svar:
Bussleiðin er ein av tænastunum til borgarnar, sum eg raðfesti høgt. Brúki sjálv bussin, bæði í arbeiðsøðrindum og privat. Má tó siga, at eg hevði brúkt bussleiðina enn meira, um hon var betur skipað. Bussleiðin er eitt av málunum sum bæði Javnaðarflokkurin og Tjóðveldisflokkurin í valstríðnum lovaðu at betra. Ja, vit hava visjónir um bussleiðina, men enn er ov tíðliga, at siga nakað ítøkuligt um hvat vit fara at arbeiða við. Persónliga haldi eg, at bussleiðin kundi verið ókeypis fyri borgarnar. Um vit skulu gera bussleiðina ókeypis, so haldi eg at tað má verða við tí endamálið, at minka munandi um privatu ferðsluna í býnum. Eitt avgerandi argument haldi eg vera, at vit mugu seta alt inn, fyri at minka  um dálkingina, bæði útlátið frá bilunum, dusti frá píkunum og slitið á vegirnar. Her er veruliga nógvir spurningar at loysa. Bussleiðin er ein spennandi avbjóðing sum eg gleði meg til.

10.11.2004
Spyrjari: Páll
Spurningur:
Tillukku við valinum! Var tað rætt at fokusera so nógv upp á at velja kvinnur, at bara kvinnur vórðu valdar, og at Javnaðarflokkurin nú er ein kvinnuflokkur í Býráðnum. Tað kann so ikki kallast javnstøða.
Góðan arbeiðshug og góða eydnu!

Svar:
Takk fyri. Sjálv helt eg tað vera rætt, at fokusera á kvinnur til valið. Hesaferð hjálpti kvinnukjaki, í Tórshavnar Býráð sum heild, nú er javnstøða. Í býráðnum sum tekur við 1. januar 2005 eru 6 kvinnur og 7 menn. Nú vænti eg, at borgarin fer at merkja, at politisku avgerðirnar hava eitt breiðari grundarlagið, tí bæði kynini eru javnt umboðaði. Í Javnaðarflokkinum blivu bara kvinnur valdar, tað haldi eg ikki ger so nógv í sjálvum sær, mennirnir hava umboða okkum rættuliga leingi frammanundan. Tó at tað besta hevði verið um vit fingu tað 3. umboðið við eisini, til tess gjørdust vit einar 30 atkvøður ov stutt. So hevði ein maður eisini verið valdur.

31.10.2004
Viðmerking til greinina "Havnin heldur útjaðaranum uppi":
Spurningur:
Eg havi fingið fleiri viðmerkingar til provokerandi greinina “Havnin heldur útjaðaranum uppi”. Tit tykkum í útjaðaranum, sum kenna tykkum rakt og særd: Greinin var ein provokatión, tí eg ferð eftir ferð havi kent meg sjálva provokeraða av fólki, sum hava mótarbeitt Havnini! Tí fer greinin yvir kantin sumstaðni :-)
Eg havi fingið fimm atfinningarsamar viðmerkingar frá fólki í útjaðaranum, og eina viðmerkring frá einum, sum er jublandi samdur. Tá spurningarnir og viðmerkingarnar fylla alt ov nógv á hesari síðu, havi eg savnað spurningarnar og viðmerkingarnar á síðuni har greinin er.

Havnin heldur útjaðaranum uppi + viðmerkingar :-)

27.10.2004
Spyrjari: Jákup

Spurningur:
Hey, hvat heldur tú um avtøkuna av Rás Tórshavn?

Svar:
Eg var ímóti avtøkuni, tá ið Rás Tórshavn var avtikin, tí tað var ein góð tænasta til borgararnar í Havn. Hinvegin verður Rás Tórshavn  helst ongantíð sett á stovn aftur.

24.10.2004
Spyrjari: Heri Eysturlíð

Spurningur:
Hey Elin! Fyrr í hesi býráðssetuni dýraði tú uppá, at tú aldrin aftur fór at stilla upp á sama lista sum Tórfinn Smith. Skilji teg so sera væl - máti skal hóast alt vera í galskapinum. Men nú eru tit tross d... á sama lista! Skjótt kann broytast í politikki, so kanska eru tit bæði blivin samd aftur?
Skal fara at lesa greinarnar hjá tær meira gjølla, hatta um krematorium virkar áhugavert, og eg taki fult undir við uppskotinum (havi tó ikki lisið tína grein enn).
Við gomlum Uppistovukvøðum, Heri Eysturlíð, Stockholm

Svar:
Orsaka, at eg ikki svari fyrr enn nú! Eg havi sera nógv um at vera fyri tíðina. Nógvir fundir, og eg eri til arbeiðis hetta vikuskifti eisini. Ja, eg endaði á sama lista. Eg kom til, at eg mátti stilla upp, annars lat eg tann partin, sum hevði handlað skeift, vinna. Politikkur snýr seg um at stríðast fyri sínum sjónarmiðum. Tíverri eisini ofta innanfloks :-)

14.10.2004
Spyrjari: Havnarborgari

Spurningur:
Síggi at ein, ið kallar seg havnarborgara hevur spurt Jógvan Arge hendan spurningin: "Nú eru vit øll soleiðis háttað, at vit doyggja - summi fyrr, onnur seinni. Eg ivist ikki í, at tað eru nógvir havnarborgarar, sum eru samdir við mær, tá eg sigi, at vit fyri langt síðani áttu at havt fingið ein ovn til líkbrenning.
Hvat heldur tú um hetta? Ætlar tú at arbeiða miðvíst við hesum málinum, um tú verður afturvaldur í býráðið?" Jógvan Arge svarar heldur neiligani, hann sigur m.a.: "...Hinvegin er tað vist ikki heilt kostnaðarleyst heldur at reka eitt krematorium. Hartil kemur, at vit hava als ikki siðvenjuna fyri líkbrenning."
Haldi sjálvur at svari er nakað tunt, tað kostar eisini pengar at reka ein kirkjugarð og sjálvandi kunnu vit ikki hava nakra siðvenju á økinum, tá vit ongan ovn hava.
Hvat heldur tú um hetta evni Elin?

Svar:
Hey Havnarborgari! Ja, eg vil ógvuliga fegin arbeiða fyri einum krematorium í Havn. Eg kann bara geva tær rætt. Sjálvandi hava vit onga siðvenju, tá umræður líkbrenning. Tað vit mugu gera er, at kanna hvat kostnaðurin av kirkjugarðinum er, soleiðis sum vit hava hann í dag - og kanna, hvørji umhvørvislig árin hann hevur. Tað kann verða, at samanumtikið verður bíligari og betri at brenna lík heldur enn at grava tey niður.

Les eisini greinina: Omma vildi brennast

13.10.2004
Spyrjari: Trøndur
 
Spurningur:
Hvat við Havnini, sum ein býur, har tað er gott hjá fólki við breki at búgva. (ein handikapp vinarligan bý).
05.10.2004
Spyrjari: Hildur Hermansen

Spurningur:
Góða Elin! Aftur ein sápuspurningur av Virkni. Pálmolja er ikki at fáa á apotekinum, hvar keypir tú pálmolju? Dótturin varð fermd sunnudagin og tínar sápur vóru sjálvsagt á w.c.inum við navnamerkinum hjá tær á, nógvar góðar viðmerkingar vóru um sápurnar.

Svar:
Hey Trøndur! Sjálvandi eiga vit at gera nógv meira fyri at fáa Havnina til ein bý har rørslutarnað kunnu ferðast ótarnað. Eisini eiga vit at hugsa um hetta í øllum bygdunum í Suðurstreymoy og Kollafirði. Eitt nú manglar ein lyfta á Býarbókasavninum. Hetta verður kallað “beinleiðis skomm”  í álitinum um mentan og list í Tórshavnar kommunu, sum kom út í ár 2000. Men har er so einki hent enn. Hetta vil eg arbeiða fyri at fáa broytt. Eg vil eisini arbeiða fyri at ein ætlan verður gjørd,  sum skal leggja dent á at gera Havnar kommunu til “eina kommunu fyri allar borgarar”.

13.10.2004
Spyrjari: John Madsen

Spurningur:
Hey Elin - tú plagdi at vera ófør. Eg valdi teg eisini seinast - men tað virkar, sum tú bara ert kritisk...sitandi samgonga hevur fingið ymiskt av skafti t.d. innan barnaansing. Kanst tú ikki siga okkurt rósandi um fólk -sjálvt um tú ert í andstøðu. Tað vildi styrkt tí persón. Ov nógv sjálvrós er ikki gott.

Svar:
Hey John Madsen! Sannleikin er, at hóast eg eri blakað úr øllum nevndum í býráðnum, havi eg arbeitt konstruktivt. Og lesur tú mínar valgreinar, so fær samgongan rættiliga góðan frið fyri mær, hóast har er ríkiligt at finnast at. Eg havi eisini í greinum fegnast um, at trupulleikin við barnaansingini er loystur. Men eg má eisini gera vart við mistakið, tá býráðið brýtur markið fyri, hvussu nógv børn verða tikin inn í barnagarðarnar.
So má eg siga tær eitt: Í politikki snýr tað seg um, at vísa, hvat man vil berjast fyri og at undirbyggja, at man fær úrslit. So tá ið tað eydnast okkum at fáa allar býráðslimir at taka undir við barnaansing til øll, so vísi eg sjálvandi á, at eg var millum tey, sum broytti hendan hugburð. Vit hava langt á mál á nógvum øðrum økjum, so vit hava framvegis nógv at berjast fyri. Eg havi eisini sent t-bræv til tín!

Svar:
Góða Hildur, tillukku við dóttrini!
Eg keypi pálmuoljuna frá Urtegaarden í DK.
Bílegg á heimasíðuni sum er: www.urtegaarden.dk .
   Adressan er:
   Urtegaarden Aps.
   Aldershvilevej 1
   Vivild
   8961 Allingåbro
   Tlf. 86480011
Her fæst alt til sápur, krem, bomm o.l.

27.09.2004
Spyrjari:  Hildur Hermansen

Spurningur:
Góða Elin! Gott at tú stillar upp aftur, kvinnur skulu ikki lata seg trýsta út at magtspælinum hjá monnunum.
Men eg skrivi her av heilt aðrari orsøk. Vit á Virkni hava ætlanir um at gera tálgasápur. Í tínum uppskriftum brúkar tú neytatálg. Tí hava starvsfólk biði meg spurt teg, um tað ikki er møguligt at brúka seyðatálg, og hvat er annars munurin? Alt tað besta!

Svar:
Góða Hildur! Seyðatálg er minst líka so góð sum neytatálg. Eg havi broytt uppskriftina, nú er hon við seyðatálg. Eg brúkti neyta tálg í byrjanini, tá ið eg lærdi meg at gera sápur, tí eg hevði eina grunduppskrift við neyta tálg. Tá bar væl til at fáa neyta tálg, Sláturvirkið í Hósvík, slaktaði alt árið. Nú brúki eg tað tálg, sum eg havi ella kann fáa fatur á.

31.05.2004
Spyrjari: Javnaðarmaður

Spurningur:
Hey Elin. Tú ert ófør og tú hevur púra rætt viðvíkjandi Smith-málinum. Vónandi stuðlar allur flokkurin tær eisini. So mann ikki verður noyddur til at viðganga, at tað bara er tú sum hevur nos... í Suðurstreymoyar Javnaðarfelag. Halt á, tú ert flokkinum eitt gott umboð.

Svar:
Takk fyri, tað fløvar!

28.04.2004
Spyrjari: Bjørt Samuelsen

Spurningur:
Hey Elin! Bert ein heilsan. Plagi ikki at vitja tína heimasíðu, men surfaði framvið í morgun -frálík síða! Las tíni sjónarmið um kvinnulistan, og má viðganga at eg eri samd við tær. Spurningurin er so bara, hvussu URD og tær sum arbeiða við Kvinnulistanum kunnu stuðla teimum kvinnum sum stilla upp, soleiðis at fleiri veruliga verða valdar?

Svar:
Takk fyri viðmerkingina. Tað, sum eg vil við míni grein um kvinnulistan, er at kveikja upp undir eitt kjak um kvinnuliga umboðan bæði í býráðnum, bygdarráðum og á tingi. Haldi at tað er uppá tíðina at javnstøða millum kynini fær pláss í teimum politisku flokkunum. Eg trúgvi, at vit kvinnur sjálvar mugu taka stigi, tí menninir vilja sjálvandi ikki av við valdið. Skulu kvinnur framat, so mugu menn víkja. Okkara mál má verða, at kvinnurnar verða eins nógvar og menninir. Tástani hava vit veruligt fólkaræði. Kvinnurnar í URD kunna t.d. gera sína ávirkan galdandi við at stuðla kvinnunum í teimum politisku flokkunum. Eg trúgvi at allar URD kvinnurnar, hava sín flokk, hóast tær kanska ikki eru limir. Tær, sum eru limir, kunna møta á uppstillingarfundi, og har gera sína ávirkan galdandi, soleiðis at  tær fáa ta kvinnuna ella tær kvinnurnar á listan, sum tær vilja stuðla. Síðani fylgja tí upp við at arbeiða fyri at fáa hesar kvinnur valdar. Tað er so ein háttur. Men tað, sum umræður, er, at kjaki um kvinnur ikki steðgar upp.  Mín vón er, at nýggja býráðið, sum tekur við 1. januar 2005, verður umboða við 7 kvinnum, t.v.s. 6 monnum og 7 kvinnum. Tað eigur at bera til, um vit gera okkara arbeiðið nóg væl. Kvinnur eru hóast alt helvtin av borgarunum  í kommununi.
Les eisini:   kvinnulistin


26.04..2004
Spyrjari: Anonym

Spurningur:
Hey Elin! Allar fyrst vil eg bara siga: Keep up the good work;)
Men jeg har et lidt anderledes spørgsmål til dig!
Du lægger jo ikke skjul på, at du er homoseksuel. jeg vil bare gerne spørge dig om det er svært at være homoseksuel på Færøerne. ikke noget ondt om færinge (jeg er selv færing), men der er mange på Færøerne som ikke er så gode til at acceptere homoseksuelle (nu har jeg sikkert fornærmet nogen, i så fald: SORRY).Jeg ved ikke om du gider at svare på den slags spørgsmål, men jeg ville blive glad hvis du ville. Jeg kender nemlig ikke mange homoseksuelle fra Færøerne, men jeg ved, at der er mange homoseksuelle fra Færøerne som flytter, fordi de ikke føler, at de bliver accepterede. Det ville hjælpe at få et svar fra en ægte homoseksuel færing!!! På forhånd tak!
10.02.2004
Spyrjari: Dagmar Andreasen  FHS

Spurningur:
Hvat halda tygum um tjóðpall Føroya? halda tygum at Tjóðpallur Føroya skuldi komi?

Svar:
Eg haldi at Tjóðpallur Føroya hevur sera stóran týdning fyri okkum sum tjóð og ikki minst fyri okkara mentan. Ja, eg haldi so avgjørt at Tjóðpallur Føroya skal koma.
Les eisini:
Tjóðpallur Føroya og 
Røða hildin á mentanarkvøldi á Maiarínum
 

05.02.2004
Spyrjari: Føroya Pedagogfelag

Spurningur:
Okkara fyrispurningur í samband við málið um at fara til jarðarferð ella lækna.
Hvat er samtyktin í fíggjarnevndini og hvat var/er arbeiðssetningurin hjá hesi serligu nevnd.

Svar:
Her er allur teksturin til málið m.a. viðvíkjandi jarðarferðum og læknavitjanum.
Fíggjarnevndin 11. desember 2003: Samtykt viðvíkjandi døgurðasteðginum, at øll, sum starvast hjá kommununi meira enn hálvan dag, skulu halda døgurðasteðg uppá í minsta lagi 1/2 tíma.
Samtykt viðvíkjandi lækna/tannlækna at heilsurøkt er privat ørindi, og at starvs-fólk í samráð við leiðsluna kunnu fáa frí uttan løn og stempla út í privatørindi.
Samtykt viðvíkjandi jarðarferð at starvsfólk í samráð við leiðsluna kann fáa frí uttan løn og stempla út í privatørindi, og at starvsfólk fær frí at fylgja nærmastu familju, ommum og abbum, foreldrum og verforeldrum, systkjum v/ húski og starvsfelaga, tó í mesta lagi ein dag.
Samtykt viðvíkjandi leiðarum at hesir skulu verða fevndir av starvfólkaskipanini, tá talan er um informatións-stempling, feriu, sjúkradagar, barnasjúkradagar o.a.
Hinvegin koma stjórar og deildarleiðarar í fyrisitingini ikki undir flexskipanina. Teir eru meira settir at loysa eina leiðsluuppgávu enn at starvast ávísar klokkutímar um dagin. Tí kemur tímateljarin í klokkuskipanini at vera leiðbeinandi uttan rætt til avrokning.
Eru leiðarar í hesum bólki, sum hava serliga ábyrgd ella serligar skriv-ara/protokollførarauppgávur, eiga hesir at vera samsýntir við serligum ræðisvið-bótum um arbeitt verður aftaná kl. 17.
Leiðarar mugu ikki vera munandi ánarar, nevndarlimir ella stjórar í/fyri fyritøkum uttan góðkenning frá stjórnini.
Viðvíkjandi framíhjáarbeiði kann eitt starvsfólk hjá kommununi ikki átaka sær lønt framíhjáararbeiði, sum onnur kommunal starvsfólk skulu hava eftirlit við.
Hevur ella ætlar starvsfólk at átaka sær framíhjáararbeiði, forvæntar kommunan, at hann/hon tosar við leiðsluna um hetta, um ivi er um, um hetta arbeiði fellur innan- ella uttan fyri tað, sum vanliga verður góðtikið.
Framíhjáarbeiði skal, óansæð um hetta er lønt ella ikki, í vavi ikki vera størri enn, at viðkomandi eisini á fullgóðan hátt kann røkja kommunala arbeiðið. Í sambandi við framíhjáarbeiði roknar kommunan við, at viðkomandi vísir neyðugu virðingina og atlit í mun til arbeiðið hjá kommununi.
Starvsfólk hjá kommununi mugu ikki brúka setanina hjá kommununi til at fáa sær serligar persónligar fyrimunir.
Arbeiðssetningurin hjá serstaka ráðgevandi bólkinum, er sambært býráðssamtykt frá 22. mai 2003 soljóðandi: Bólkurin skal gera fyrireikandi og ráðgevandi arbeiði viðvíkjandi bygnaðinum, lønum/samsýningum, starvsviðurskiftum o.ø.

20.01.2004
Spyrjari: Johan

Spurningur:
Halló Elin! Sendi tær ein spurning ella viðmerking í gjár um leiguíbúðir og rentustuðul. Hevur tú onga viðmerking til hann, ella er tað bara vanligi arbeiðshátturin hjá nýggja Javnaðarflokkinum "at reypa og einki gera"?

Svar:
Halló Johan! Tín spurningur er ikki komin til mín, tí havi eg heldur ikki svarað tær. Men eg havi svarað øðrum uppá líknandi spurning. Tú kanst eisini fara inn í leitiskipanina á forsíðuni, leita undir íbúðir ella bústaðir, har finnur tú hópin av greinum. Tú kanst eisini senda spurningin av nýggjum, so skal eg svara honum.

Svar:
Tú mást hava misskilt okkurt! Tað eg havi sagt um samkynd er, at tey skulu stillast líka fyri lógini sum hinkynt!  Um tú hevur áhuga í evninum, so hava samkyndir Føroyingar stovna felagsskapin Friðarbogin. Um tú hevur áhuga, kanst tú venda tær til teirra.
Les eisini:  samkynd

19.01.2004
Spyrjari: Jákup á Lag

Spurningur:
Flogvøllur á Glyvursnesi liggur frammaliga hjá mær. Góða Elin, lat tað vera eitt tað fyrsta, ið tú gerð. So verður tað tú. Heilsan Jákup á Lag.

Svar:
Eg haldi eisini at flogvøllur eigur at gerast á Glyvursnesi, um kanningarnar, sum verða gjørdar, vísa, at tað ber til. Tá fáa vit eisini ein longri og betri vøll. Við tveimum flogvøllum hava vit so ein alternativan vøll, tá ið tað er neyðugt.

18.01.2004
Spyrjari: duldur

Spurningur:
Síggi, at tú skrivar bæði um samkynd, tjóðpall og fosturtøku. Tú hevur eina greiða og góða hugsan um hesi viðurskifti. Men hongur hon saman við Javnaðarflokkinum? Er hetta ikki bara valflesk? Eitt trygt løgtingsumboð hjá flokkinum hevur jú somu hugsanir um hesi viðurskifti sum Miðflokkurin, so er nakar sum helst realpolitikkur í at hava eina modernað hugsan. Hevði tað ikki verið uppá sítt pláss at Listi C fann eina felagshill at standa á, ella er hetta sum vanligt, at valevni bert dyrgja við hvør sínum agni. Hvat hendir aftaná valið er líkamikið?

Svar:
Ja, mínar hugsanir hanga væl saman við grundsjónarmiðnum hjá Javnaðarflokkinum. Tað er rætt, at vit hava ein tingmann í flokkinum, sum hevur aðra hugsan um samkynd, tjóðpall og fosturtøku enn eg. Javnaðarflokkurin hevur ikki eina greiða støðu um skrásett paralag. Í hesum spurningi stendur tað upp til hvønn einstakan lim at taka støðu. Viðvíkjandi fosturtøku so eru flest øll í Javnaðarflokkinum samd um, at praksis av verandi lóggávu er á eini góðari leið, men lógin treingir harðliga til dagføring. Sjálv haldi eg, at vit mugu tosa um fría fosturtøku, bæði innanfloks og alment. Um vit ikki viðgera spurningin, so hendir einki. Eg vil gera mítt til, bæði inni í flokkinum og alment, at vit einaferð náa málinum, at lata kvinnuna ráða yvir egnum kroppi. Politikkur er at vilja broytingar, og tað er tað, eg ynski at gera, tá ið eg sigi mína hugsan bart út. Viðvíkjandi Tjóðpallinum so atkvøddu 6 tinglimir fyri lógini og 1 atkvøddi blankt, tá í lógin var fyri í tinginum. Tað er nú einaferð soleiðis, at tann persónurin, sum er valdur á ting, tekur sjálv/ur støðu, hóast tað í summum førum kann verða keðiligt, at ein flokkur ikki er samdur. Grundleggjandi er Javnaðarflokkurin fyri einum Tjóðpalli.

17.01.2004
Sendari: einlig mamma

Spurningur:
Hey Elin! Vilt tú arbeiða fyri at betra um bústaðarmøguleikarnar fyri einligum forsyrgjarum? Og hvat fert tú at skjóta upp? Hvussu ber tað til at einki er hent við búðstarviðurskiftinum hjá einligum forsyrgjarum??

Svar:
Ja, bústaðarmøguleikar til einligar forsyrgjarar og fólk við serligum tørvi er eitt av mínum stóru hjartamálum. Tað fyrsta vit eiga at gera er at broyta møguleikan fyri at byggja leiguíbúðir. Vit í Javnaðarflokkinum vilja virka fyri, at íbúðarfeløg fáa sama rentustuðul sum privatir sethúsaeigarar og verða frítikin mvg. Á henda hátt gerst sjálv byggingin av íbúðum nógv bíligari enn í dag. Tá verður húsaleigan eisini bíligari. Javnaðarflokkurin vil eisini virka fyri, at vit fáa eina nýggja leigulóg, galdandi fyri alt landið. Lógin skal tryggja viðurskiftini hjá leigaranum. Viðurskifti sum uppsagnartíð, kostnað og viðlíkahald o.s.fr. Tú kanst eisini fara á forsíðuna at leita eftir orðinum bústaður ella íbúðir í leititeiginum, so sært tú, at eg havi í mong ár tosað og skrivað um hetta málið. Tað skal nógv stríð og nógv orð at broyta hugsanina hjá fólki.

17.01.2004
Sendari: Erla

Viðmerking:
Eingin spurningur, bert ynskja tær alt gott og ein +
kærar heilsanir Erla

16.01.2004
Sendari: Símun

Spurningur:
Hey Elin, bert ein lítil spurningur um hugsanina hjá Javnaðarflokkinum mótvegis flóttafólki. Ætlar Javnaðarflokkurin at gera nakað fyri at hjálpa flóttafólki? Tað er sjálvsagt nakað órealistiskt , at vit taka ímóti fleiri túsund, men vit kundu tikið so mong til Føroya, sum vit makta. Hvat er tín hugsan um hetta? Hoyrdi at Óli Breckman hevði sagt í útvarpinum at fólkaflokkurin vildi als ikki hava muslimsk flóttafólk hendan vegin. Eg síggi tað, sum eina skyldu hjá okkum, at vit, sum eitt samfelag, ið er rættiliga væl fyri, hjálpa um har vit kunna.

Svar:
Javnaðarflokkurin vil sjálvandi luttaka á alttjóða støði og taka ábyrgd av heimssamfelagnum. Sjálvandi eiga vit eisini at taka ímóti flóttafólki. Eg haldi, at vit eiga at taka lutfallsliga eins nógvar flóttar sum onnur Norðurlond. Eg hoyrdi Óla Brecmann, og kann bert siga, at han er eitt svín. Eg hevði ikki spurt eitt fólk um teirra trúgv, vit hava jú trúarfrælsi. Tað er ótrúligt, at formaðurin í einum føroyskum flokki skal úttala seg so fasistiskt, sum at kalla muslimar drasl. Men í hasum flokkinum er eftir øllum at døma einki óført. Skjalafalsan, stuldur og valdstøka. Einki av tí verður átalað. Einki av tí fær avleiðingar í hasum flokkinum.


16.01.2004
Sendari: Linda

Spurningur:
Hey Elin! Um eg skilji tíni sjónarmið rætt, so hava vit somu meining um Miðflokkin! Eg havi fingið fortalt, at tú hevur lovað at nokta fyri eini samgongu við Miðflokkin, um spurningur stendst um tað. Er hetta rætt?

Svar:
Ja, tað er rætt. Eg vil ikki í samgongu við Miðflokkin. Tí eg kann als ikki góðtaka stórar partar av teirra valskrá. Velur Javnaðarflokkurin at fara í samgongu við Miðflokkin, standi eg í einari sera truplari støðu. Men eg má viðganga, at sjálvt í Javnaðarflokkinum eru fólk, sum eg ikki eri samd við í hesum málum, tíverri. So mín bardagi má ganga frá fólki til fólk.  Sjálvt innanfloks  má eg stríðast fyri mínum meiningum. Tað er tíverri eingin flokkur í Føroyum, sum hevur eina greiða meining um etisku málini. Bara einstaklingar. Men tað fara vit at broyta. Um ikki í dag, so í morgin.

Sendari: Hallstein Sigurðsson

Viðmerking:
Tað er deiligt at síggja, at tú skrivar um støðuna hjá børnunum og teirra rætt til pápan. Annars gott væl. Heilsan Hallstein

15.01.2004
Sendari: Ester

Spurningur:
Tøkk fyri pers. heilsanina. Góða, kundi tú upplýst mær um ein, ið fær minstu pensjón, hevur nakran møguleika at kunna vinna sær nøkur oyru við síðuna av? Bert nakrar fáar tímar um vikuna. Og hvar kann ein slíkur persónur venda sær til? Ein stendur sera einsamallur í hesi so kensluleysu støðu.Tá ein kennir seg ungan í sinni og ikki akkurát sær út til at vera 52, rakar hetta serliga hart. Góða, hevði tú vilja svara mær uppá hendan spurning. Óansað, so havi eg ikki nakra løtu ivast í, hvør skuldi hava mína atkvøðu. Nevnliga tú og ongin annar. Bestu heilsan frá Esther.

Svar:
Takk fyri orðini. Ja, tú hevur loyvi til at vinna ávísa upphædd. Fyri at fáa henda spurningin útgreinaðan, skalt tú venda tær til Almannastovuna tel 353510.

15.01.2004
Sendari: F5

Spurningur :
Hey góða Elin :) Vit eru ein flokkur á handilsskúlanum, ið hevur fingið nakrar spurningar, um hví tað eru so fáar kvinnur, ið stilla upp til løgtingsvalið?

Svar:
Góðu tit í F5! Takk fyri spurningin! Ein orsøk til at so fáar kvinnur stilla upp til løgtingsvalið, haldi eg, er, at tá ið uppstillingin fer fram, verður fyrst og fremst hugsað um menn. T.v.s. flestu uppskot sum koma fram eru menn. Umberingin er oftast, at tað er so trupult at fáa kvinnur at luttaka aktivt í politiskum arbeiði. Eg eri ikki samd, tí um eitt politiskt felag veruliga ynskir at stilla kvinnur upp, so skal tað gera eitt nógv størri arbeiðið millum valini, fyri at fáa kvinnurnar at stilla upp.
Okkara siðvenja hevur gjørt, at menn hava skipað arbeiðsmarkanaðin og politiska umhvørvið. Í mongum førum undir neystinum o.o. mannfólkastøð. Kvinnurnar hava skipað húsarhaldið og barnauppalingina. Henda siðvenja er við at broytast, hóast vit enn eru merkt at henni. Fyri at koma víðari, mugu mennirnir geva kvinnunum møguleika at verða við í politiska arbeiðinum, og kvinnurnar mugu krevja at sleppa við. At broyta siðvenjur tekur tíð. Fyrstu kvinnurnar, sum beinleiðis vóru valdar á ting, vóru valdar í 1978. Ì dag eru 58 kvinnur og 195 menn uppstillað til løgtingsvalið. Sí talvu á mínari heimasíðu. Eg loyvi mær eisini at ráða tykkum til, at hyggja at heimasíðuni hjá Javnstøðunevndini.

15.01.2004
Sendari: KST

Spurningur:
Vil Javnaðarflokkurin verða við til at lógarfesta rætt teirra eldru til heimarøkt. Vilja tit politiskt leggja rygg til og útgreina, hvat tænastustøðið skal liggja á.

Svar:
Tað er eingin ivi um at Javnaðarflokkurin vil tryggja øllum heimarøkt, sum hava tørv á tí. Tænastustøðið eigur at vera soleiðis, at tey eldru skulu kunna kenna seg trygg í egnum heimi.

15.01.2004
Sendari: Anna Maria

Spurningur
Um tú verður vald, ætlar tú so at arbeiða fyri: -skrásettum parlag? -fríari fosturtøku?

Svar:
Ja. Les eisini: Samkynd eru eisini Føroyingar og Kvinnan eigur at ráða yvir egnum kroppi

15.01.2004
Sendari: Hans Michael

Spurningur:
Bert ein stórur spurningur. Er tað at ráa yvir egnum kroppi at taka lívið frá einum øðrum? Skal tað lítla menniskja ikki eisini hava rætt til at ráa yvir sínum egna kroppi?????

Svar:
Vísindin meinar ikki, tað er at taka lív áðrenn tólvtu viku. Tá er talan um eitt fostur og ikki eitt menniskja.

Sendari: Magnus Jørgensen

Spurningur:
Góða Elin! Viðvíkjandi ansingarplássi til son okkara. Vit hava í dag fingið at vita at sonur okkara er á bíðilista nr. 281, og til dagrøkt nr. 93. Kona mín fór til arbeiðis eftir barnsburðarfarloyvi í november 2003, eg noyddist tí at fara í farloyvið uttan løn og havi verið tað síðani. Hevur tú nøkur ráð ella loysn á trupuleikum okkara?

Svar:
Barnaansingar tørvurin í Havnar kommunu er ikki loystur. Sitandi samgonga hevur lova at tørvurin verður loystur í ár. Í løtuni eru fleiri stovnar í gerð, sum tilsamans fara at geva 242 nýggj pláss. Soleiðis sum eg dugi at síggja tað, so verður tørvurin also ikki loystur í ár. Tykkara sonur er nr. 281 hetta merkir at tit helst ikki fáa nakað pláss í ár.
Míni ráð til tykkara eru, at tit skulu fara á býráðið, at spyrja nær sonurin sleppur inn. Tað eiga tey at kunna svara tykkum ítøkuliga uppá. Fáa tit ikki sonin inn, mugu tit finna tykkar egnu loysn uppá trupulleikan.
Eg havi í nógv ár arbeitt hart fyri barnaansingini. Í fyrstanini  t.v.s. umleið 1996 vóru vit fáir býráðslimir sum arbeiddu fyri barnaansingini. Vit møttu haðrari mótstøðu og teir vildu ikki brúka pening uppá barnaansing. Býráðslimirnir hildu stutt sagt at mamman skuldi vera heima. So vit máttu finna alternativar loysnir. Ein av loysnunum bleiv útibarnagarðurin í Havnadali, sum vísti seg at gerast ein sera góð loysn. Annars hildu vit á at berjast fyri barnaansingini. Vit hava arbeitt so mikið væl, at í dag er tað ikki ein einasti maður, sum torir at vera ímóti barnaansing. Men tað merkir ikki tað sama, sum at teir veruliga ganga inn fyri, at øll skulu hava rætt til barnaansing. Javnaðarflokkurin er farin til val m.a. við ansingartrygd. Hetta merkir at vit fara at arbeiða fyri, at øll børn skulu fáa tilboð um ansing. Eisini vil Javnaðarflokkurin virka fyri, at at foreldur skulu hava løn allar 12 mánaðirnir í barsilstíðini. Eisini á hesum øki treingir til at betra okkara tilboð, soleiðis at vit koma á hædd við hini Norðurlondini.

Les meira  um:barnsburðarfarloyvi her: Barsilsskipanin skal betrast
Tú kanst eisini fara á forsíðuna at leita eftir orðinum barnaansing í leititeiginum. Har eru út í móti hundrað greinum um barnaansing. Hetta sigur nakað um, hvussu stórt arbeiði eg havi lagt í hetta málið.



10.01.2004
Sendari: Ferðandi

Spurningur:
Hey:) havi júst hugt eftir valsendingini frá Sandoynni,í sjónvarpinum, har bleiv nevnt-1:at Sandoyggin var útjaðari?? 2:at tunnil mátti gerast til Sandoynna,tí tað tók ein heilan tíma,at koma av Sandi til miðbýin í Havn. Mín spurningur er tí: Er Kollafjørður útjaðari í Føroyum?? Tað tekur jú ein heilan tíma at koyra við bussleiðini (leið 4)úr Kollafirði til Havnar. Til samanberingar kann nevnast,at tað tekur eisini ein tíma úr Sørvági,-og 50 min. úr Vestmanna til Havnar.

Svar:
Tað er púra burturvið, at tað tekur ein heilan tíma at koma við bussleiðini úr Kollafiri til Havnar. Bussleiðin er ein tænasta til borgarnar, tí eiga vit at skipa hana soleiðis at hon er so góð sum møguligt fyri alla borgarnar. Sitandi samgonga í Tórshavnar býráð hugsar meira um at spara pening enn at veita borgarnum í kommununi eina góða tænastu. Bussleiðin (leið 4) koyrir sum er til Kalbak á veg til og úr Havnini til Kollafjørð. Fyri at betra um hesa farðaleiðina, átti ein lítil bussur at koyrt millum Kalbak og Kalbaksbotn. Ferðaætlanini hjá Kollafjaðrarbussinum og Kalbaksbussinum skal lagast soleiðis, at ferðandi kunna skifta buss í Kaldbaksbotni.

07.01.2004
Sendari: Lisa Dam

Spurningur:
Hey:) Í tykkara stevnuskrá stendur, at tit ganga inn fyri privatisering til eitt vist. Er hetta tykkara gjøgnumgangandi meining? Tit hava nógvar ymiskar meiningar í flokkinum. Hetta er keðiligt. Tit virka, sum tit vilja nakað gott fyri fólki, og allíkavæl hava tit Gerhard Lognberg sitandi har?? Hví tað?

Svar.
Privatiseringar - men ongar foreringar, soleiðis sigur Javnaðarflokkurin í valskránni. Skal ein almenn fyritøka privatiserast, skal tað loysa seg fyri samfelagið. Tænastan má í minsta lagið verða tann sama og helst betri aftaná.
Fyritøkurnar, sum landið eigur, hevur landið annahvørt stovnað ella bjargað. Tað vil siga, at skattgjaldarin hevur brúkt nógvan pening til hesar fyritøkur. Síðani hevur landið ment tær til stórar og sterkar fyritøkur, sum nú hava eitt sera høgt virði. Tí skal tað almenna tryggja sær, at tað fær hægst møguligt gjald fyri hesar fyritøkur, soleiðis at skattgjaldarin fær væl og virðiliga afturgoldið tey virði, hann hevur skapt.
Eg vil geva tær rætt í, at vit hava nógvar góðar meiningar í okkara flokki. Vit standa fyri einum samhaldsfastum samfelag, har trygd og trivnaður verður settur í hásæti.
Tá tú nevnir Gerhard Lognberg, meinar tú helst við hansara meiningar á etiska økinum, tí á sosiala økinum eru vit í flestu førum samd. Tá vit tosa um etisku virðini, so eru vit í summum førum sera ósamd. Eitt nú tá hann ætlaði at taka stuðulin frá Grímu í sambandi við Ginusøgur. Vit eru sera ósamd á kvinnupolitiska økinum, og tá talan er um skrásett parlag. Eg meini, at kvinnur eiga at ráða yvir egnum kroppi, og at samkynd eiga at verða vird av lógini á sama hátt, sum allir aðrir samfelagsbólkar. Vilt tú vita meira, um hvat eg meini um hesi mál, so vitja inn aftur komandi dagarnar. Tá fari eg at leggja greinar út um hesi mál. Og sjálvandi geri eg alt fyr at Javnaðarflokkurin skal taka hesi mál til sín sum sjálvsøgd javnaðarmál, so sum tey eru í øllum øðrum Norðurlondum

06.01.2004
Sendari: Rói Hans Pætur Hansen

Spurningur:
Hvat um eg t.d. verði settur út á gøtuna, hevði tú so hjálpt mær og givið mær eitt heim, ella hevði tú bara verið líka glað? Hvat hevði tú gjørt fyri at bjarga einum borgara?

Svar:
Góður bústaður eigur at verða ein rættur hjá øllum. Tí vil eg virka fyri, at íbúðarmøguleikarnir gerast nógv meira fjøltáttaðir, enn teir eru nú. Vit mugu broyta bústaðarpolitikkin, soleiðis at øll óansæð umstøður og førleika, hava ein góðan bústað. Nýggj leigulóg skal gerast, har leigarin fær trygg viðurskifti. Javnaðarflokkurin vil virka fyri, at tað gerst lættari og bíligari, at byggja leiguíbúðir. Tað gera vit við at geva íbúðarfeløgum somu umstøður sum privatir húsaeigarar hava, t.e. at frítaka íbúðarfeølg fyri mvg og geva teimum. Les eisini spurning og svar frá 22.04.2002, longri niðri á hesari síðuni.